Val de Barcala.es (A Baña e Negreira) a web do pobo barcalés

E chegou o frío ar siberiano, coma un manto de intemperie desaforada coa súa gradación polos baixos do mercurio.

O inverno... claro.

E nestas xeadas, novamente a viva e temperada Concellería de Servicios Sociais, volve a estar de actualidade webera, co aviso de bos asuntos que van polo Concello de Negreira.

Así, escribíalle a valdebarcala.es a concelleira de Servicios Sociais, Cintia Picado, e informaba de que a campaña internacional de recollida de móviles que cada ano fai o Instituto da naturalista uiversal Jane Goodall (IJD), xa comezou en Negreira, e xa podemos deixar o lixo dos antigos móviles, tanto na entrada do Concello de Negreira -Onde hai unha caixa ó efecto- coma nos comercios “El Carmen”, “Montyman”, “Lucaser” e “Okey”.

Neste senso, os de a pé temos a posibilidade real de mover peza e favorecer, en esbozo aínda que sexa, un futuro trocante que dignifique a nosa estancia neste paraíso terrenal que é o planeta... polo de pronto, e pese ó prometido, o único paraíso que coñecemos.

A reciclaxe de móviles, decíamos, permitirá unha reutilización de moitos destos moviles así coma dos seus componentes, cuxo tratamento reducirá a masiva e insostible demanda dos mesmos. Ó fin, esta campaña permitirá racadar fondos para proxectos de apoio ós cidadáns congoleños e ós programas de educación e conservación na República do Congo, así como para o Centro de Recuperación de Chimpancés de Tchimpounga.

Por outra banda, dende a Concellería de Servicios Sociais, tamén nos dan conta de que estanse a preparar dous cursos máis:

Curso de Inglés: Dende16 de febreiro e haberá 2 grupos de 12 persoas, xa se poden vir a apuntar con Laura de Voluntariado ou en Servizos Sociais. Será os xoves de 10 a 11 e de 11 a 12 nas Brañas. Prioridade: mulleres e homes desempregadas/os, alumnos que asisten ás clases para obter o graduado escolar (+ de 25 anos), discapacitados físicos e sensoriais, familias numerosas, persoas que teñan concedida a RISGA.

Curso de elbaroción de xabróns: En Marzo. Falar con Laura, de Voluntariado ou en Servizos Sociais. Prioridade para os menores de 40 anos.

Ler máis...(Comentarios 0)

O PSOE de Negreira amosa o seu desacordo co novo emprazamento privado para a ximnasia municipal

O asunto é que ata o saudable exercicio físico, desentumecedor da friaxe invernal que o húmido inverno barcalés nos hereda nos osos e músculos, pero tamén na ialma nosa, no ser de seu, de nós, esa actividade municipal que fai vecindade no esforzo compartido, suor comunitario na frente barcalesa, ata aí chegan os conflictos do consistorio.

Denuncian os socialistas nicrarienses, desta vez non tan hormonados como noutras ocasións, que a Concellería de Deportes que encara Manel Hombre non leva a gala ser deportiva, pois se transpira a camiseta é para seguir a disciplina do equipo da primeira división nacional mudando de espazo o recinto onde se exercitaban públicamente os veciños (ata agora na sala de usos múltiples do Novo Centro Socio Cultural) por unha propiedade privada levada pola monitora municipal, e todo isto feito de maneira unilateral, sen xogo de equipo, sen contar coa oposición, e deixando os aparellos queimadores de grasas cos que o anterior goberno con Jorge Tuñas como cabeza de pelotón decorara a sala, amoreando voaxa.

Exercitade, se o considerades oportuno, os vosos ollos lendo íntegramente a nota de prensa que nos remitiron dende a agrupación socialista de Negreira, premendo un máis que adestrado dedo (xa son máis de tres anos de actividade do díxito!) no “ler máis”.

Mens sana in corporacion sana!

Ler máis...(Comentarios 0)

"damnosa hereditas"

De avíos soprados polo fol do interese chan. De beiras arrimadas... deitadas de mala herba agreste e ruda. De area e palla... pósitos de mala alcurnia que tufan na lumbre feita de miolos esmirriados. De cousas banas, de enganos e tortas víboras de sona, de letras zarrapicadas, óxido de malas chuvias...

Gobernos que foron, paseniños, sen dentada nen brío, de tona verde ou pasada, impíos para o pobo e viles na institución. Ásperas figuras de lenes adovíos espúreos que desdeñan, lixeiros, o ar da comuna silente... Este feble niño de paifocos desfiucegados que pían nos petoutos que habitan, coma a brisa no Corzán.

Así vai o fío que tira da bisbarra nosa. Terra copiosa de seu, vertida no vulgo pola indolencia dos que tiran.

E sacudimos un día, e que máis dá...

Que nada había das contas na Xunta do Concello de Negreira e que esta falta de presentación, deixaba ó noso concello sen posibilidade de acceso a determinadas subvencións.

E decíamos que cando denunciamos doutra vez a falta de presentación das contas ó Ministerio de Economía (Non á Xunta) e non era certo, na premura do tempo afianzouse a verdade que dende o Concello de Negreira tiraron -Tamén das orellas weberas por decir mal os datos-, salvando á veciñanza e ofrecendo explicación, meritando entón de cara e peiteado sobre a xestión eficiente do concello.

Desta vez, weberos, o que dixo Valdebarcala.es era e sigue sendo certo:

.- O Concello de Negreira non presentou aínda no Consello de Contas, as contas do Exercicio de 2010.

Rendición de Contas -2010 -dos Entes Locais. Actualizado 30 de Xaneiro de 2012

Nin unha soa letra nen deferencia para os veciños saíu agora do Concello para explicar esta situación.

Ad honorem... O sono eterno da masa dá os mountruos que durante tanto tempo bambean polo Val de Barcala.

Rexos berces bambeantes.

Ler máis...(Comentarios 0)

Retallos de Intrahistoria Barcalesa: “Alfredito”, por Manolo López Tuñas

Recuperamos hoxe unha das seccións con máis enxundia barcalesa na web e das que mellores acollidas ten, pola calidade dos textos que recollemos nela. Os retallos de intrahistoria barcalesa, anaquiños do que fomos sen os cales non seríamos. Imprenscidible, logo coñecelos para chegar a ser.

E sumerxémonos con permiso no blog do bo amigo Manolo López Tuñas repescando (qué doado é pillar unha boa peza nese mar aberto de historia barcalesa do profesor e historiador barcalés!) a impresionante entrada que lle adicou á relevante familia Caamaño de Negreira, tomando como pistoletazo de saída o descubremento por parte do autor do nome de Alfredo Caamaño Pato, “Alfredito”, de entre outros insignes nomes como Castelao, Luis Seoane, Picasso, etc...nunha exposición do Kiosco Alfonso de A Coruña que homenaxeaba ós exiliados españois da dictadura.

Un texto emotivo e ben documentado que debería ser de coñecemento obrigado para todos os que hoxe facemos con ser Negreira, se non queremos ir coxeando de historia cada vez que os pés nos leven polas nosas rúas. Abaixo deixamos, ademáis da posibilidade de ler o texto no noso "ler máis", o enlace á entrada do blog “Ágora” onde o texto se acompaña de fotografías, bibliografía e fontes. Todo un traballo documentativo que lle agradecemos a Manolo comparta con toda a comunidade na rede.

Ágora: “Alfredito”

Ler máis...(Comentarios 0)

Alfonso Paz-Andrade, visitará no mes de Maio o IES "Xulián Magariños de Negreira

E sobre o webero cartafol de Albi, vai hoxe o anuncio que nos deixaban dende a Vicedirección do IES “Xulián Magariños” de Negreira, dunha nova visita de sona e renome que recibirá a nosa terra de barcala, Alfonso Paz-Andrade.

“O empresario vigués Alfonso Paz-Andrade, experto internacional en temas de pesca, director da revista Industrias Pesqueras e vicepresidente da Fundación Castelao -entre outros varios cargos- , virá ó IES “Xulián Magariños” de Negreira nun día do vindeiro mes de maio para ofrecernos unha conferencia sobre a vida e obra de seu pai, Valentín Paz-Andrade, o ilustre galeguista a quen este ano se lle dedica o Día das Letras Galegas.

Este encontro de Alfonso Paz-Andrade coa comunidade educativa do Instituto de Negreira incluirá tamén un coloquio co alumnado e profesorado do Centro, para abeirar temas relacionadas non só coa figura do escritor homenaxeado neste 17 de maio, senón tamén ó redor dos problemas actuais do sector da pesca e do significado da empresa multinacional galega PESCANOVA, da que Alfonso Paz-Andrade foi conselleiro-delegado durante 33 anos.

Acompañamos esta nota do curriculum vitae de Alfonso Paz-Andrade”

Así se expresaba a nota de prensa procedente do IES “Xulián Magariños” e así deixamos tamén na webera o currículum anunciado, baixo o sempiterno “ler máis”.

Ler máis...(Comentarios 1)

O Xefe Territorial de Educación e o Concello de Negreira, pechan (un trato) para pechar (o pavillón do Colexio)

Cos tratos procedimentais dos rigores máis formais xa no peto, quedaba xa que logo a instrumentación imaxinada -de imaxe- e visita de posición no lugar da obra que será. E o será, según dín, de circuncisión amurallada para a pista polideportiva do colexio público, que transformará o rudo aspecto co que históricamente figurou -Ancha até o ar- para se converter nun recinto cuberto polos flancos, aquelando, deste modo, unha sorte de pavillón escolar do primeiro mundo.

E así, amablemente nos achega o goberno do PPBN, unha nota de prensa onde se nos informa da visita que con aquelas intencións fixo a Negreira o Xefe territorial de Educación, Indalecio Cabana, que puido ver así o lugar de execución, e pechar o trato para o peche da pista cos nosos dirixentes, Juan Rey -Concelleiro de Obras- Luis Calviño -Concelleiro de Cultura- e Manel Hombre -Concelleiro de Deportes-.

E informan dende o goberno municipal, que esta é unha xestión entre o leal Concello de Negreira e a austera Xunta de Galicia, que ven a cumprir co compromiso gubernamental vertido ó pouco tempo de chegar ó poder. Mais... non dí se o compromiso foi de mera xestión ou de cargo a conta...

E decimos nós, con verbas que estarán no pensamento de moitos weberos, e antes de deixar no ler máis a nota, se este compromiso que se di, é namáis compromiso de mera xestión talmente, pois facemos lembranza que houbo un día de haber... fai pouco máis de un mes, onde un evento importante no Coto, organizado pola ANPA e destilado pola Orquestra Olympus, recadaba fondo monetario para facer obras no centro de primaria nicrariense.

Neste senso, e que se saiba por eiquí, non houbo conta de contas, nin cita se fai na nota de prensa de tal cousa feita. E non é que a cousa sexa baladí, e xa que o tema se move institucionalmente, pensa Albi que fala polo pobo, cando advirte a través das verbas estas, que é imperativo cidadán, o saber canto custa a obra, quen pon os cartos e cantos son os que sexan.

Facendo clickiño no ler máis, podes ler integramente a nota de prensa que amablemente nos cederon dende o Concello de Negreira

Ler máis...(Comentarios 0)

Diario dun Aventureiro Barcalés: Capítulo XIV "Naranjo de Bulnes. Quijote, 390M. M.D."

Do fidalgo manchego D. Alonso Quijano (ou Quixote), sabemos o que Miguel de Cervantes quixo e deixou escrito nas súas dúas gloriosas e magnas obras que relataban as desventuras do da triste figura e o seu leal Sancho. Aquelas históricas novelas, cumio da literatura universal, inspiraron no tempo andante un sinfín de teimas literarias e artísticas que, como todas as grandes obras, impregnaron de matices o mundo que veu despois.

E se fixo Cervantes inscripción inmemorial no mundo da literatura, outras artes inspiraron tamén as súas postas no ar literario cervanteiro, e así, as artes todas (pintura, escultura, teatro, cine...) recolleron este macrocosmos manchego para o virtuosismo das súas obras. E mesmo no vulgo das sociedades quedou artellado un significado propio do Quixotesco neste mundo.

Neste senso de inspiración moderna, resulta que o Quixote do lugar aquel, vai tamén con nome e representación en lugares e teimas tan alonxadas -en apariencia- daquel mundo orixinal caballeresco. Mundos tan exóticos para D. Alonso, como pode ser unha vía de ascenso nun afamado peñón asturiano.

E vai que, efectivamente o é, e foron barcaleses, amigos, quenes quixeron que aquela vía que abriron por primeira vez na historia (O que é subir por onde ninguén subira antes) do coloso astur que lle din “Naranjo de Bulnes”, quedara inmortalizada por sempre, como vía de “Don Qujote”.

A historia desta ascensión histórica vertebrada por xente da nosa terra, barcaleses de forza, enxeño e pulso, queda agora inmortalizada nesta webera, gracias as verbas escritas con vigor e talento polo noso bo amigo aventureiro, Rubén Suárez Carballo. Un deses Quixotes que emprenderon a aventura única, de abrir un vial de máis de douscentos metros en vertical no xigante de pedra, Uriellu.

Facendo click ler máis, toparás coa aventura feita letra.

Ler máis...(Comentarios 0)

O atleta barcalés, Jorge Crespo Arias, vencedor no III Cross da Pobra do Caramiñal

Resulta inevitable comprometer unha vez máis, e con tanto gusto, unhas verbas de admiración e aplauso hacia o noso atleta barcalés Jorge Crespo Arias. Talento perfilado no contínuo esforzo dos entrenos, e que lle leva ao noso veciño, a bicar a gloria do trunfo unha vez máis.

E desta que foi este pasado Domingo día 22 de Xaneiro de 2012, nas lonxanas terras lindantes co bravo océano atlantico da Pobra do Caramiñal, onde o sol vai coma rei no verán de area e sal, e que neste inverno seco e frío, cedeu a coroa ó entregado maxisterio deportivo de Jorge Crespo Arias, o noso bravo nicrariense que resultou vencedor no III Cross do Concello da Pobra do Caramiñal.

Unha vez máis, queda en Valdebarcala.es, esta fervorosa noraboa para o incansable barcalés Jorge Crespo Arias.

¡Que pulmóns! ¡Que corazón! ¡Que pernas!

Ler máis...(Comentarios 0)

O Concello de Negreira lanza a páxina web de Servizos Sociais

Para que os veciños de Negreira saiban en todo momento os servizos que dende o Concello se lles está a ofrecer no social, a concellería de Servizos Sociais ven de abrir na convulsa pero aínda viva rede unha nova páxina.

Informan na páxina principal da mesma que o obxectivo é “dar a coñecer a todos os veciños de Negreira o persoal que temos dispoñible para atendelos e tamén para dar información actualizada de todo o que facemos dende esta concellería polo benestar do pobo”.

Todo as conxugacións do verbo informar son aplaudidas dende esta webera barcalesa e por iso felicitamos ó Concello por incorporar un novo espazo dentro da sempre útil web do Concello de Negreira, a cal leva varios anos de excelente labor na rede.

Tedes dúas maneiras de acceder á páxina dos Servizos Sociais do Concello de Negreira. Ben a través do link “Servizos Sociais” que atoparedes na páxina principal da web do Concello de Negreira, ou ben a través da dirección da nova páxina:

Concello de Negreira. Servizos Sociais

Ler máis...(Comentarios 0)

Estrea de "Sigue buscando" o novo e animado videoclip dos barcaleses Marmota Phil

Un artístico videoclip, digno de calquera top "indie" e que supón un chanzo máis de calidade na crecente carreira artística e musical da banda barcalesa.

Presentado oficialmente o pasado sábado na televisión oficial do Grupo Voz (Voz TV), o pegadizo single que dá título ó álbum "Sigue Buscando", enféitase para a ocasión con animadas estradas, bares de malos peches e rúas chuviosas, que fan de crepuscular ambente no que desenrolar os xa clásicos rasgos nas guitarras que, sustentados na base dun hipnótico punteo de baixo (acordo do mellor Bob Hardy) sacuden as notas clásicas e viscerais de rock ´n roll made in Marmota Phil.

Unha banda barcalesa que segue buscando... ¡E medrando!

NOTA: O älbum dos Marmota Phil "Sigue Buscando" está á venta nos seguintes lugares:

- Negreira: Bar A Esmorga
- A Baña: Bar Muíño
- Santa Comba: Pub Montgo

Prezo: 5€

Ler máis...(Comentarios 1)