Val de Barcala.es (A Baña e Negreira) a web do pobo barcalés

Cos tratos procedimentais dos rigores máis formais xa no peto, quedaba xa que logo a instrumentación imaxinada -de imaxe- e visita de posición no lugar da obra que será. E o será, según dín, de circuncisión amurallada para a pista polideportiva do colexio público, que transformará o rudo aspecto co que históricamente figurou -Ancha até o ar- para se converter nun recinto cuberto polos flancos, aquelando, deste modo, unha sorte de pavillón escolar do primeiro mundo.

E así, amablemente nos achega o goberno do PPBN, unha nota de prensa onde se nos informa da visita que con aquelas intencións fixo a Negreira o Xefe territorial de Educación, Indalecio Cabana, que puido ver así o lugar de execución, e pechar o trato para o peche da pista cos nosos dirixentes, Juan Rey -Concelleiro de Obras- Luis Calviño -Concelleiro de Cultura- e Manel Hombre -Concelleiro de Deportes-.

E informan dende o goberno municipal, que esta é unha xestión entre o leal Concello de Negreira e a austera Xunta de Galicia, que ven a cumprir co compromiso gubernamental vertido ó pouco tempo de chegar ó poder. Mais... non dí se o compromiso foi de mera xestión ou de cargo a conta...

E decimos nós, con verbas que estarán no pensamento de moitos weberos, e antes de deixar no ler máis a nota, se este compromiso que se di, é namáis compromiso de mera xestión talmente, pois facemos lembranza que houbo un día de haber... fai pouco máis de un mes, onde un evento importante no Coto, organizado pola ANPA e destilado pola Orquestra Olympus, recadaba fondo monetario para facer obras no centro de primaria nicrariense.

Neste senso, e que se saiba por eiquí, non houbo conta de contas, nin cita se fai na nota de prensa de tal cousa feita. E non é que a cousa sexa baladí, e xa que o tema se move institucionalmente, pensa Albi que fala polo pobo, cando advirte a través das verbas estas, que é imperativo cidadán, o saber canto custa a obra, quen pon os cartos e cantos son os que sexan.

Facendo clickiño no ler máis, podes ler integramente a nota de prensa que amablemente nos cederon dende o Concello de Negreira

Ler máis...(Comentarios 0)

Diario dun Aventureiro Barcalés: Capítulo XIV "Naranjo de Bulnes. Quijote, 390M. M.D."

Do fidalgo manchego D. Alonso Quijano (ou Quixote), sabemos o que Miguel de Cervantes quixo e deixou escrito nas súas dúas gloriosas e magnas obras que relataban as desventuras do da triste figura e o seu leal Sancho. Aquelas históricas novelas, cumio da literatura universal, inspiraron no tempo andante un sinfín de teimas literarias e artísticas que, como todas as grandes obras, impregnaron de matices o mundo que veu despois.

E se fixo Cervantes inscripción inmemorial no mundo da literatura, outras artes inspiraron tamén as súas postas no ar literario cervanteiro, e así, as artes todas (pintura, escultura, teatro, cine...) recolleron este macrocosmos manchego para o virtuosismo das súas obras. E mesmo no vulgo das sociedades quedou artellado un significado propio do Quixotesco neste mundo.

Neste senso de inspiración moderna, resulta que o Quixote do lugar aquel, vai tamén con nome e representación en lugares e teimas tan alonxadas -en apariencia- daquel mundo orixinal caballeresco. Mundos tan exóticos para D. Alonso, como pode ser unha vía de ascenso nun afamado peñón asturiano.

E vai que, efectivamente o é, e foron barcaleses, amigos, quenes quixeron que aquela vía que abriron por primeira vez na historia (O que é subir por onde ninguén subira antes) do coloso astur que lle din “Naranjo de Bulnes”, quedara inmortalizada por sempre, como vía de “Don Qujote”.

A historia desta ascensión histórica vertebrada por xente da nosa terra, barcaleses de forza, enxeño e pulso, queda agora inmortalizada nesta webera, gracias as verbas escritas con vigor e talento polo noso bo amigo aventureiro, Rubén Suárez Carballo. Un deses Quixotes que emprenderon a aventura única, de abrir un vial de máis de douscentos metros en vertical no xigante de pedra, Uriellu.

Facendo click ler máis, toparás coa aventura feita letra.

Ler máis...(Comentarios 0)

O atleta barcalés, Jorge Crespo Arias, vencedor no III Cross da Pobra do Caramiñal

Resulta inevitable comprometer unha vez máis, e con tanto gusto, unhas verbas de admiración e aplauso hacia o noso atleta barcalés Jorge Crespo Arias. Talento perfilado no contínuo esforzo dos entrenos, e que lle leva ao noso veciño, a bicar a gloria do trunfo unha vez máis.

E desta que foi este pasado Domingo día 22 de Xaneiro de 2012, nas lonxanas terras lindantes co bravo océano atlantico da Pobra do Caramiñal, onde o sol vai coma rei no verán de area e sal, e que neste inverno seco e frío, cedeu a coroa ó entregado maxisterio deportivo de Jorge Crespo Arias, o noso bravo nicrariense que resultou vencedor no III Cross do Concello da Pobra do Caramiñal.

Unha vez máis, queda en Valdebarcala.es, esta fervorosa noraboa para o incansable barcalés Jorge Crespo Arias.

¡Que pulmóns! ¡Que corazón! ¡Que pernas!

Ler máis...(Comentarios 0)

O Concello de Negreira lanza a páxina web de Servizos Sociais

Para que os veciños de Negreira saiban en todo momento os servizos que dende o Concello se lles está a ofrecer no social, a concellería de Servizos Sociais ven de abrir na convulsa pero aínda viva rede unha nova páxina.

Informan na páxina principal da mesma que o obxectivo é “dar a coñecer a todos os veciños de Negreira o persoal que temos dispoñible para atendelos e tamén para dar información actualizada de todo o que facemos dende esta concellería polo benestar do pobo”.

Todo as conxugacións do verbo informar son aplaudidas dende esta webera barcalesa e por iso felicitamos ó Concello por incorporar un novo espazo dentro da sempre útil web do Concello de Negreira, a cal leva varios anos de excelente labor na rede.

Tedes dúas maneiras de acceder á páxina dos Servizos Sociais do Concello de Negreira. Ben a través do link “Servizos Sociais” que atoparedes na páxina principal da web do Concello de Negreira, ou ben a través da dirección da nova páxina:

Concello de Negreira. Servizos Sociais

Ler máis...(Comentarios 0)

Estrea de "Sigue buscando" o novo e animado videoclip dos barcaleses Marmota Phil

Un artístico videoclip, digno de calquera top "indie" e que supón un chanzo máis de calidade na crecente carreira artística e musical da banda barcalesa.

Presentado oficialmente o pasado sábado na televisión oficial do Grupo Voz (Voz TV), o pegadizo single que dá título ó álbum "Sigue Buscando", enféitase para a ocasión con animadas estradas, bares de malos peches e rúas chuviosas, que fan de crepuscular ambente no que desenrolar os xa clásicos rasgos nas guitarras que, sustentados na base dun hipnótico punteo de baixo (acordo do mellor Bob Hardy) sacuden as notas clásicas e viscerais de rock ´n roll made in Marmota Phil.

Unha banda barcalesa que segue buscando... ¡E medrando!

NOTA: O älbum dos Marmota Phil "Sigue Buscando" está á venta nos seguintes lugares:

- Negreira: Bar A Esmorga
- A Baña: Bar Muíño
- Santa Comba: Pub Montgo

Prezo: 5€

Ler máis...(Comentarios 1)

O Concello de Negreira, sen subvencións por non remitir a conta do exercicio 2010

E van os tempos de hoxe cos canos pechados, de billas atrofiadas que non decantan froito... Tupidas formas que enfeitan un aquel de secano. E nin Megaupload para o mundo, nin a Xunta de Galicia para o Concello de Negreira...

¡Ningún dos entes dá, a día de hoxe, proveito nos “petitums”!

E vai así -no que ó Concello de Negreira se refire- que según se publica hoxe na páxina oficial do Consello de Contas (Organismo depente da Xunta de Galicia), é o de Negreira, un dos que todavía non cumpríu coa obriga de “presentar as contas do Concello no Consello”, e porén, non leva o beneficio adherido de desfrutar das subvencións que a Xunta de Galicia dispón para os entes locais galegos.

E o caso lembra moito a aquel no que se sinalaba ó Concello de Negreira como non presentador das contas perante o Ministerio de Facenda e cuxa falta deixaría ó Concello sen participación nos orzamentos estatais. E lembramos que daquela a webera tivo que rectificar por voz da Concelleira de economía, Lorena Rivas Rial, que apretaba na orella redactora -e daquela con razón- advertindo que as contas si se presentaron ó Ministerio. E era certo.

O que non se falou daquela, foi de que se ben as contas estaban presentadas no Ministerio... ¡Non facían o propio na Xunta de Galicia!... Onde, a día de hoxe, e tal e como informa o Consello de Contas na súa web, inda quedan por presentar, deixando entón na lista dos concellos presentadores, un oco onde tería que estar Negreira, cuxos veciños, quedan así privados de recibir as subvencións ás que se tivera dereito.

Neste senso, os veciños temos unha obriga crítica, porque pode ser que os gobernantes digan o que xa dixeron moitas veces de que o anterior Goberno do PSOE de Jorge Tuñas, fixo tal desfeita de números que non hai HAL 9000 capaz de preparar con xeito as contas -Situación que pode durar ata o 2020... ¡Ou máis!-. Nembargantes... e hai que decilo... sí que tiveron tempo, dende os despachos do Concello de Negreira, para preparar, redactar e enviar unha carta informativa remitida a todos os veciños, na que se informaba sobre a débeda existente... Por coherencia, tocaría xa que logo -se do que se trata é de ter ben letrados ós veciños nas contas-, unha carta informando desta nova situación de perda de subvencións. Por honestidade.

A realidade, é que non foron quen dous partidos gobernando en alianza de remitir a tempo ó Consello de Contas de Galicia ás correspondentes ó ano 2010... Con perda para os veciños, claro, que en relación ás contas, namáis reciben e escoitan desaires cara a anterior xestión.

Velaí deixamos o enlace que che leva á lista dos Concellos que presentaron as contas no Consello (E no que si está A Baña) e que por iso levan o dereito de recibir subvencións da Xunta de Galicia.

(Actualizado a día 18/01/2012, falta Negreira).

Rendición de Contas -2010 -dos Entes Locais

Ler máis...(Comentarios 0)

A diplomacia educativa barcalesa do Servicio de Mediación, recibe os seus diplomas

E os diplomas, para os diplomáticos. Así foi que foi e así o é que o amosamos tamén na webera valdebarcalesa, coas fotografías que dende o IES “Xulián Magariños” de Negreira nos fixeron chegar.

A diplomacia local no eido educativo, foi recoñecida no “seu seo” propio do Instituto, nun acto institucional onde pais, docentes e alumnos, categorizaron o talante e presentaron unha cerimonia que instituía de modo oficial ós alumnos encargados da nada sinxela labor mediadora para este ano 2012.

Comentaba Adelino Pose Reino, Director do Centro Educativo Barcalés, que “O acto tivo lugar no Salón de actos do I.E.S. "Xulián Magariños", antonte martes 17 de Xaneiro ás 18:00 horas, e nel interviron:

Dna. Enriqueta Lois Salgado, coordinadora del servizo de mediación.

Dn. Cipriano Núñez Rodríguez, coordinador del contrato-programa.

Dn. Adelino Pose Reino director.

Dn. Jorge Tuñas Caamaño presidente da ANPA " A Barcalesa.

Tamén asistiron: D. Carlos Vila LagoDna. Begoña Cortés Ferro orientadora, o alumnado mediador xunto a membros das súas familias, profesorado e público en xeral".

Así, os encargados da pausa e o talante suaviño na resolución dos conflictos que nazan, recolleron as súas distincións como mediadores, diplomáticos da educación a quenes acudir en arbitraxe, para que os problemas e discordias que veñan na comunidade que conforman pais, profesores e alumnos, adquiran o ton da mesura e o encanto propio da verba racionada.

E aí vai que deixamos en Valdebarcala.es, as fotografías dos actos cedidas polo propio Centro para a súa publicación.

¡E Parabéns ós diplomáticos!

Ler máis...(Comentarios 0)

BNG de Negreira: “Solidaridade sí, pero primeiro cos veciños de Negreira”

Facendo gala dos tempos críticos que alguén decidiu que nos tocaba vivir, o BNG de Negreira aforra caracteres disparando unha nota de prensa para matar dous paxaros dun tiro.

E escriben que mentras as gaivotas se solidarizan con viales veciñas esquecendo de rematar e arranxar o estado dalgunhas carreteras do concello barcalés, algúns paspallás atraídos polo fulgor gratuíto dos aparatos, arramplaron cos seus picos 27 teléfonos móbiles do concello. E si te he visto non me lembro!

Hai paxaros e paxaros, pois pola contra, si dalgún pecado aletea a mascota da webera barcalesa, a nosa curuxa Albi, é de ser curiosa e un pouco lingoreteira, non hai nova que lle chegue que non comparta cos veciños! Así tedes, se repiqueteades no “ler máis”, a nota íntegra que nos remitiron dende o BNG de Negreira.

Ler máis...(Comentarios 0)

Marta Gómez, terceira no Trofeo Teresa Herrera de Karate!

Barcaleses, ide pensando en ampliar o cuarto onde almacenades as satisfaccións polo local, que xa vai quedando o espazo escaso para recoller os méritos e valías dos nosos!

A última en engrosar o listado de éxitos foi Marta Gómez, alumna da Escola de Karate Akai-Ryu, acadando un máis que meritorio terceiro posto na modalidade Kumite Cadete de menos de 47 quilos da III Edición do Trofeo Teresa Herrera de A Coruña.

E ollo, que alí competía o mellor do karate nacional, con representates das poderosas escolas de Castilla y León, Castilla La Mancha e Madrid. Xa se di que, dende o Xapón, miran de reollo a ese fermoso e lonxano val onde semella que se dan as condicións idóneas para que os seus habitantes dominen a técnica da man baleira. Máis que se deixen de contos, que nós sabemos que detrás destes éxitos, o único segredo é o esforzo e a aplicación constante dos alumnos de Akai-Ryu.

Non se acadaron máis resultados pola ausencia, por motivos familiares, dunha das integrantes do equipo representante de Galicia en Kata por equipos, do que forma parte a barcalesa Carla Rodríguez. Un equipo de garantías que de seguro, polo nivel de forma no que se atopan este ano, nos ía agasallar outro bo resultado. Outra vez será!

Noraboa a todo o equipo da Escola de Karate Akai-Ryu polo bo facer, polo bo competir e polos bos resultados, e en particular, a nosa admiración e parabéns para Marta Gómez.

E comentan na Escola que isto só é o inicio do inicio!

Ler máis...(Comentarios 1)

O Concello de Negreira presenta os servicios de "Fisioterapia 2012" e "Talleres de Memoria"

Co tempo xa remendando no ano, a saudable tradición do traballo vai indo tamén con certa cadencia de efectividade na Concellaría de Servizos Sociais do Concello de Negreira, que con brío debuxa un marco de actividades asistenciais nesta primeira metade de ano que, co galo da crise cacareando nas eiras, non leva mal fol.

Dous son os servicios asistenciais que o Concello presenta e anuncia en Valdebarcala.es:

- Talleres para mellorar a Memoria
- Programa de Fisioterapia 2012

Prestacións que xa están no punto da difusión pública para o apuntamento de quen queira e asemade leve as condicións precisas.

Neste senso, según informa á webera a Concelleira de Sanidade, Servizos Sociais, Muller e Igualdade, Cintia Picado, os Talleres para Mellorar a Memoria serán gratuitos e para maiores de 60 anos. Asemade, o Programa de Fisioterapia, tamén sera gratuito (40 sesións a domicilio) e está pensado para as pesoas con discapacidade do Concello de Negreira.

Para apuntarse a este e aquel servicio, haberá que chamar ó núm de teléfono: 981 88 53 81 (Ou acudir de corpo presente ó Concello)

Estupenda iniciativa que, malia estos tempos de malas quedas, non descoida a atención á saúde dos veciños que precisen asistencias do tipo.

Despois de clicar no ler máis, terás acceso ós textos facilitados pola Concelleira, onde se informa dos programas, requisitos, horarios e lugares nos que se van a desenvolver as actividades.

Ler máis...(Comentarios 0)